د غلامۍ ډول غږوونکو چوپتیا غوره کړې

د غلامۍ ډول غږوونکو چوپتیا غوره کړې

د طالبانو او یو شمېر سیاسیونو ترمنځ  دا باور دی چې حکومت د نورو غلام دی او نه شی کولای د خپل هېواد په ننګه غږ پورته کړي.

کله چې خبره د افغان ولس د برخه لیک شوه، وضعیت ګونګ و، څوک نه پوهېدل چې د افغانانو راتلونکی برخه لیک به څه ډول وي؟

د سولې پروسه د افغان حکومت له ښکېلتیا پرته په چټکۍ روانه وه، ټولو سره اندېښنه وه چې څه به کېږي.

د ملي امنیت سلاکار حمدالله محب امریکې پرې امریکایانو نیوکه وکړه چې  ولې يې حکومت د سولې پروسه کې څنډې ته کړی دی؟

له دې څرګندونو وروسته اروپايي ټولنې، ناټو او نورو نړیوالو سازمانونو له امریکا په ځانګړې توګه له زلمي خلیلزاد غوښتنه وکړه چې باید مونږ ته د سولې خبرو په تړاو توضیحات راکړې او افغان حکومت دې پروسه کې شامل کړي.

که خبره د غلامۍ او ګوډاګیتوب وای، یو لوړ پوړي افغان چارواکي به امریکا کې امریکایانو ته دا خبره نه کوله، خو نه! هغوی غلامان نه ول، هغوی سره د وطن غم  دی.

د محب له خبرو وړاندې کلونه مخکې د فلسطین د بیت المقدس موضوع رسنیو کې ګرمه وه، د نړۍ ګوټ ګوټ کې عامو مسلمانانو غږ پورته کاوه، خو د هېوادونو په کچه  دغسې یو ذهنیت او جرات نه و، ټرمپ هم ګواښ دا کړی و، که چا د فلسطین او بیت المقسد ننګه وکړه، مرستې پرې بندوو، زمونږ هره برخه کې مالي ملاتړی واشنګټن دی، خو ټولو به کتلي وي چې ولسمشر غني لومړنی کس و چې د بیت المقدس په ننګه یې غږ پورته کړ او د امریکا اقدام يې ناروا وباله.

نن چې د افغانستان د سرنوشت موضوع ده او د امریکا ولسمشر د ترهګرو  ملاتړي هېواد د مشر په مخکې د افغانستان د محوه کولو موضوع راپورته کوي، همدا ولسمشر چې حکومت یې لا هم د امریکا په پیسو چلېږي، راپورته کېږي او نیوکه کوي چې باید امریکا وضاحت ورکړي او مونږ اجازه نه ورکوو چې په برخه لیک مو بهر کې تصمیم ونیول شي.

هغوی چې اوس د افغانستان پر خاوره د ۷۰ سلنه واکمنۍ ادعا لري، ولې د ټرمپ د خبرو په مقابل کې چوپ پاتې دي؟ واضح خبره  ده چې دوی د افغانستان پر سر معامله کوي، معامله کې پاکستان ښکېل دی او د افغان حکومت لخوا د نه مقاومت او مبارزې په صورت کې به زمونږ هر څه پاکستان ته ورسپارل کېږي.

Leave a Reply

Your email address will not be published.