د قطر مذاکرات؛ خلیلزاد ولې له دوحې په بېړه نوې ډیلي ته ولاړ؟

محور؛ دوشنبه، د زمري میاشتې ۱۴ مه: د افغانستان د سولې لپاره د امریکا د بهرنیو چارو وزارت ځانګړی استازی چې دوحه کې له طالب پلاوي سره د سولې په اتم پړاو خبرو بوخت و، نوې ډیلي ته رسېدلی دی.

خلیلزاد پر خپله ټویټر پاڼه لیکلي:

” د قطر مذاکراتو کې پرمختګ شوی دی، زه اوس نوې ډیلي ته ولاړم تر څو هلته د افغان سولې په تړاو پر نړیوالې اجماع او همغږۍ کار وکړي.”

تر دې وړاندې زیاته تمه وه چې ممکن خلیلزاد به نن یا هم سبا له طالبانو سره د سولې موافقه لاسلیک کړي، خو لیدل کېږي چې دغه بهیر نور هم غځېدلی دی.

خلیلزاد ډاډ ورکړی چې:

” تېرو څلورو ورځو کې مې له طالبانو سره مذاکرات وکړل، د خبرو اصلي هدف د هو جزییاتو بشپړول و چې تېرو پړاوو کې مو پیل کړي  دي. مونږ د داسې یوې هوکړې د تر لاسه کېدو په لټه کې یوو چې له افغانستانه په مشروط ډول د بهرنیو ځواکونو وتلو ته زمینه برابره کړي.”

لیدل کېږي چې د کشمیر پر مسله د هند او پاکستان وروستۍ راپورته شوې لانجې د افغان سولې بهیر هم تر تاثیر لاندې راوستی دی او خلیلزاد یې دې اړ کړ چې باید هند ته سفر وکړي.

تېره ورځ د پاکستان د ملي امنیت شورا ویلي و چې هند غواړي د افغانستان د سولې بهیر پر وړاندې خنډونه راپورته کړي.

بلخوا تازه بیا ځینو سرچینو رسنیو ته ویلي: امریکا طالبانو ته ویلي چې له القاعده سره به خپلې اړیکې پرې کوي، خو طالبانو دغه وړاندیز رد کړی دی.

د طالبانو ویاند سهیل شاهین هغه راپورونه هم رد کړي چې ګواکې د قطر مذاکراتو کې له طالبانو سره د پاکستان استازي هم موجود دي.