محب: سیمه ییز هېواودنه باید د ډلو پر ځای د افغان دولت له لارې د سولې پروسه کې همکاري وکړي

محب: سیمه ییز هېواودنه باید د ډلو پر ځای د افغان دولت له لارې د سولې پروسه کې همکاري وکړي

د ملي امنیت سلاکار حمدالله محب تېره و رځ د روسیې د اوفا لسم امنیتي کنفرانس په څنډه کې د ۶ هېوادونو د ملي امنیت سلاکارانو په ناسته کې ګډون او وینا کړې ده.

د افغانستان، روسیې، چین، هند، ایران او پاکستان د ملي امنیت سلاکارانو د تېرې ورځې شپږ اړخیزه غونډه چې د ملي امنیت سلاکار حمدالله محب په نوښت دایر شوې وه، د ګډون کوونکیو هېوادونو له استازیو غوښتنه شوې  که د افغان سولې له بهیر سره مرسته او همکاري کوئ، د ډلو ټپلو پر ځای باید د افغان دولت له طریقه مخ ته لاړ شي.

نوموړي په ټینګار سره ویلي، چې له ډلو ټپلو سره د سیمې د هېوادونو خبرې او ناستې به هېڅ عملي جنبه ونه لري، ځکه د سولې او جګړې صلاحیت د افغان حکومت دی.

ملي امنیت سلاکار باور ښودلی چې افغان دولت د سولې پروسې ته بشپړ ژمن دی، چې ښه بېلګه يې د مشورتي لویې جرګې جوړېدل و.

محب ویلي چې حکومت د مشورتي لویې جرګې د پرېکړو او غوښتنو پلی کېدو ته ژمن دی چې تازه يې زیات شمېر طالب بندیان هم خوشې کړې دي.

هغه روسیه کې شپږ اړخیزې غونډې ته د وینا پر مهال طالبان تورن کړي چې سولې ته ژمن نه دي او د افغان حکومت له ښه نیت سره سره، دوی تر اوسه د سولې پروسې د بري لپاره مثبت او عملي اقدام نه دی کړی.

ښاغلي محب د غونډې ګډونوالو ته خطاب کې ټینګار کړی چې د سولې برخه کې باید د افغان حکومت په رښتینولۍ او تعهد شک ونه شي.

د هېواد د ملي امنیت سلاکار ویلي چې افغانان د افغانستان تر څنګ، سیمې او نړۍ هېوادونو د امنیت تامین په خاطر هم قرباني ورکوي چې باید له پامه و نه غورځول شي.

په همدې حال کې د شپږ اړخیزې غونډې ګډون کونکو هېوادونو استازو هم د محب د وروستي  دریځ هرکلی کړی دی.

هغوی  ویلي چې د افغان حکومت په مشرۍ د سولې له پروسې ملاتړ کوي.

د روسیې په اوفا ښار کې د تېرې ورځې شپږ اړخیزه غونډه د افغانستان په غوښتنه او نوښت جوړه شوه.

غونډه کې پرېکړه شوې چې د همدې غونډې د بهیر بله ناسته به ایران کې جوړېږي.

Leave a Reply

Your email address will not be published.