محب: نه به بیا کډوال شو، نه به چاته تسلیم

محب: نه به بیا کډوال شو، نه به چاته تسلیم

ملي امنیت سلاکار حمدالله محب د ۱ ټلوېزیون لخوا جوړه شوې مناظره کې برخه اخېستې ده.

محب ویلي، چې امنیتي ځواکونه زمونږ د تېرو دوو لسیزو د لاسته راوړنو لویه برخه ده او هغوی چې فکر کاوه ۲۰۱۴ کال کې به نظام سقوط وکړي، خو تاسو ولیدل چې امنیتي ځواکونو له خپل هېواد دفاع وکړه.

ملي امنیت سلاکار هیله څرګنده کړې، چې د هرې ورځې په تېرېدو سره پر امنیتي ځواکونو د خلکو باور زیاتېږي او خلک خپل اولادونه هڅوي چې د امنیتي ځواکونو لیکو ته لاړ شي او وطن ته خدمت وکړي.

د محب په خبره، څه موده وړاندې د بهرنیو استخباراتو یو شمېر مزدورانو زمونږ امنیتي او دفاعي ځواکونو ته سپکای وکړ او وې ویل چې دغه سرتېري مونږ له منځه وړو، تاسو ولیدل چې دغه کسان د افغانانو له سخت غبرګون سره مخ شول. د افغانانو دغه غبرګون زمونږ د امنیتي او دفاعي ځواکونو په روحیه مثبت تاثیر وکړ.

ملي امنیت سلاکار ویلي، مونږ باید په خپلو سرتېرو او افغانیت وویاړو، مونږ باید خپلو امنیتي ځواکونو ته لا زیات درناوی ولرو. هغه پولیس چې زمونږ له مال، ناموس او ځان څخه دفاع کوي، هره شېبه یې ژوند له ګواښ سره مخ دی؛ خو هغوی دا خپل مسوولیت بولي.

ښاغلي محب ویلي، چې زمونږ امنیتي ځواکونو خپل ځان له ګواښ سره مخ کړی، خو د ټولو افغانانو ساتنه کوي.

محب څرګنده کړې چې که د سولې هدف دا وي چې مونږ تسلیم شو، دا زمونږ قربانیو ته بې احترامي ده، که له سولې هدف د ثبات تامین وي او زمونږ لاسته راوړنې په کې خوندي وي، یوازې مونږ نه، بلکې ټول خلک د دغه کار ملاتړ کوي.

د هېواد د ملي امنیت سلاکار ویلي، دا هېڅ امکان نه لري چې د اردو او پوځ په موجودیت کې دې مونږ چاته تسلیم شو؛ خو هېواد کې د ثبات د تامین غوښتونکي یو

ښاغلي محب ټینګار کړی، که سوله راځي، دا زمونږ د امنیتي او دفاعي ځواکونو لاسته راوړنه ده، ځکه همدې ځواکونو د جګړې مقابل لوری دې اړ کړی چې باید سوله وکړي.

محب ویلي څوک چې غواړي د زور له لارې ځان قدرت ته ورسوي، مونږ ورته وایو چې دا خوب او خیال مو له فکر او ذهن وباسئ. ځکه زمونږ هېواد په هېڅ صورت شاتګ نه کوي، بلکې پرمختګ به کوي.

ملي امنیت سلاکار ویلي، چې امنیتي ځواکونو د یو شخص د سیاسي فلسفې لپاره خپل ځان نه قربانوي، دوی له ورځینیو سیاسي موضوعاتو ور هاخوا یو سپېڅلی هدف لري چې هغه له هېواد او د هېواد له خلکو مشروع دفاع ده.

د محب په وینا، هر څوک چې ددې خاورې پر ضد وسله پورته کوي، د افغانستان د خلکو دښمن دی، هغه که طالب دی، داعش دی او یا هم مافیايي بانډ.

هغه ټینګار کړی یواځینی ارګان چې زیات بهرني دښمنان لري، هغه زمونږ امنیتي او دفاعي ځواکونه دي. هر هېواد چې غواړي افغانستان کمزوری کړي، لومړنی ګوزار یې زمونږ په زړورو امنیتي او دفاعي ځواکونو دی.

ملي امنیت سلاکار د مناظرې په جریان کې ویلي، د امنیتي ځواکونو رهبرۍ ته مو هغه کسان راوستي چې په وطن مین دي او له زړه غواړي چې یو تغییر راولي او دې هېواد ته خدمت وکړي؛ مونږ نه بیا کډوالي غواړو، نه تسلیمي.

Leave a Reply

Your email address will not be published.