چین د سولې هوکړې تطبیق ضمانت ته چمتووالی وښود

چین د سولې هوکړې تطبیق ضمانت ته چمتووالی وښود

د ملي  امنیت سلاکار  حمدالله محب د افغانستان لپاره د چین د خلق جمهوري دولت له ځانګړي استازي دینګ زیجون سره  کتلي دي.

له ملي امنیت شورا خپره شوې خبرپاڼه کې راغلي، چې دواړو لوریو د سولې په بهیر بحث کړی دی.

 

زیجون د افغانستان د سولې بهیر کې د چین د وروستیو هڅو په اړه د ملي امنیت سلاکار ته مالومات ورکړي دي.

هغه ویلي، هېواد یې د افغانانو په مشرۍ او مالکیت د سولې له پروسې ملاتړ کوي او همداشان د سولې هوکړه لیک تطبیق ضمانت ته چمتووالی دی.

 

نوموړي زیاته کړې، چین لېواله دی چې د افغانانو په مشرۍ او مالکیت د سولې خبرو  اترو کې د آسانچاري رول ادا او کوربتوب یې وکړي.

 

د چین استازي څرګنده کړې چې د افغانستان د حکومت له حضور او ښکېلتیا پرته به د سولې هر ډول ترتیبات او توافقات عملي نه شي او د چین دولت د سولې مذاکراتو کې د جمهور رییس غني د هڅو ملاتړ کوي.

 

په همدې حال کې حمدالله محب د سولې او ثبات برخو کې د چین هڅې ستایلې دي او زیاته کړې يې ده چې د سولې بهیر کې باید د افغان ځواکونو قربانیو ته درناوی وشي.

 

هغه ټینګار کړی چې د افغانستان دولت سولې ته د رسېدو لپاره جامع پلان او قوي هوډ لري؛ خو له ترهګرۍ سره مبارزې ته به همداسې ژمن و اوسي.

 

 

Leave a Reply

Your email address will not be published.