کابل سبا ته د افغان سولې په نوم د نړیوالې ناستې کوربه دی

د افغان سولې په تړاو سبا په کابل کې نړيواله ناسته کيږي. په دې ناسته کې د ۲۵ هېوادونو او دريو نړيوالو سازمانونو مشران ګډون کوي او پتيل شوې، چې د افغانستان د وضعيت په تړاو به خبرې اترې وکړي.
د بهرنيو چارو وزارت وياند شکيب مستغني نن په کابل کې يوې خبري ناستې ته وويل، د کابل پروسې د ناستې موخه دا ده چې د ترهګرۍ پر ضد د مبارزې په برخه کې واحده اجماع رامينځته شي. مستغني وويل ولسمشر غني به په دې کنفرانس کې يو ځل بيا د سولې ټينګښت ته د افغان حکومت پر جدي ارادې ټينګار وکړي.
د ولسمشر سرپرست وياند شاه حسين مرتضوي هم د کابل د پروسې ناسته مهمه وبلله او زياته يې کړه، چې حکومت به له دې فرصته په استفادې يو ځل بيا له وسله والو مخالفينو سره د سولې پر خبرو ټينګار وکړي. د کابل د پروسې نړيواله ناسته سبا په داسې حال کې جوړيږي، چې کابل تېره اونۍ د خونړيو بريدونو شاهد و.
يادو بريدونو ته په کتو چارواکي له رسنيو، سياسي مشرانو او خلکو غواړي، چې د کابل د ناستې ملاتړ وکړي او له حکومت سره يو ځای د سولې غږ بدرګه کړي.

Leave a Reply

Your email address will not be published.